Mkuu wa Chuo cha Ustawi wa Jamii Dkt. Joyce Nyoni amepokea ujumbe wa wanafunzi walioshiriki mashindano ya #Shimivuta yaliyofanyika mkoani Tabora kuanzia tarehe 11 hadi 23 Desemba 2025. Katika michuano hiyo timu za wanafunzi wa #ISW zimetwaa vikombe, medali na vyeti vya ushindi kama ifuatavyo; medali ya mshindi wa pili mbio za mita 400 wanawake, kombe la mshindi wa tatu karata, kombe la mshindi wa kwanza mbio za magunia na cheti cha timu yenye nidhamu bora mshindi wa pili. "Ni heshima kubwa kwa chuo kwa ushindi huu mlioupata, ushindi huu uwe mfano na kipimo cha juhudi za kufanya vyema zaidi mashindano yajayo," alisema Dkt. Joyce. Kwa mujibu wa mkuu wa chuo, ameeleza kuwa michezo ni nyenzo muhimu ya kuwafanya wanafunzi kuwa imara na shupavu. Aidha, aliwahimiza kuendelea na mazoezi kwa kuwa michezo huchochea ufaulu katika masomo yenu, huongeza mahusiano mema katika ya vyuo na wanafunzi wenzenu kutoka vyuo mbali mbali. Naye, Selemani Mwenda Kiongozi wa Michezo kutoka Serikali ya Wanafunzi (ISWOSO), amemuahidi Mkuu wa Chuo cha Ustawi wa Jamii kuwa wataongeza ushawishi kwa wanafunzi wengi kushiriki michezo ili kuibua vipaji ambavyo baadaye huzaa ajira na kipato kwa kila mmoja ambacho huchangia maendeleo binafsi na taifa kwa ujumla

Wahitimu wa Chuo cha Ustawi wa Jamii (ISW) wametakiwa kuwa wabunifu na kubadilisha elimu ya huduma za ustawi kuwa biashara ili kujiajira wenyewe huku lengo kuu ni kutatua changamoto zilizopo ndani ya jamii zao. Akizungumza katika Mahafali ya 49 ya Chuo cha Ustawi wa Jamii Kampasi ya Dar Es Salaam na Mahafali ya nane ya Kampasi ya Kisangara kwa niaba ya Waziri wa Maendeleo ya Jamii, Jinsia, Wanawake na Makundi Maalum, Dkt. Dorothy Gwajima, Mkuu wa Wilaya Temeke, Sixtus Mapunda amewaasa kuitumikia taifa kwa utii na uadilifu. "Mkawe wabunifu mkajiongeze dunia imebadilika mahitaji ya wananchi ni mengi Elimu ya saikolojia haikuwa biashara kwasasa inahitajika sana katika jamii zetu na mnapata fedha hivyo tuhamishie huduma za ustawi wa jamii kuwa biashara kuna makampuni na taasisi wanahitaji huduma hizi tuwe na juhudi na kuna matokeo ya juhudi za muda mrefu," amesisitiza Mhe. Mapunda Kwa upande wake Naibu Katibu Mkuu wa Wizara ya Maendeleo ya Jamii, Jinsia , Wanawake na Makundi Maalum Amon Mpanju amesema wahitimu hao katika fani mbalimbali za huduma za ustawi wa jamii watatumika kuisaidia jamii kutatua changamoto zao katika kuleta Ustawi wao. Naye Mkuu wa Chuo cha Ustawi wa Jamii, Dk Joyce Nyoni amesema kwa mwaka wa masomo 2025/2026 Chuo kimeanzisha programu mpya nne ikiwemo masomo na maendeleo ya ujasiriamali, utatuzi wa migogoro kwa njia mbadala, kazi za jamii, watoto na vijana na mafunzo ya makuzi na malezi ya awali kwa watoto. Amesema katika mahafali hayo kuna jumla ya wahitimu 3100 kati yao 2017 ni wanawake na wanaume ni 1083 walitunukiwa tuzo zao katika fani mbalimbali za ustawi wa jamii.

Naibu Mkuu wa Taasisi Mipango, Fedha na Utawala, Dkt. Zena Mnasi Mabeyo akipokea tuzo ya Uandaaji wa Hesabu kwa Viwango vya Kimataifa vya Uhasibu wa Sekta ya Umma (International Public Sector Accounting Standards (IPSAS), kundi la Vyuo vya Elimu ya Juu Tanzania. Katika tuzo hizo Chuo cha Ustawi wa Jamii kimeibuka mshindi wa tatu,ikiwa ni mara ya nane mfululizo toka mwaka 2017 #ISW inashika nafasi za juu kwenye mashindano hayo. Naibu Mkuu wa Taasisi aliambatana na Mhasibu Mkuu, Aisha Kapande Wahasibu na Wakaguzi wa Hesabu za Ndani kutoka Chuo cha Ustawi wa Jamii. Tuzo hizo zimetolewa na Bodi ya Taifa ya Wahasibu na Wakaguzi wa Hesabu (NBAA) usiku wa tarehe 04/12/2025 katika ukumbi wa APC Bunju, jijini Dar es Salaam.

Mkutano wa 5 wa Wadau na Wanafunzi wa Uanagenzi kutoka Chuo cha Ustawi wa Jamii umefanyika katika Kampasi ya Dar es salaam, ukiwakutanisha wamiliki wa Taasisi mbalimbali pamoja na Wanafunzi wanaotarajia kuanza mafunzo ya vitendo kupitia programu ya uanagenzi. Mkutano huu umefanyika kuanzia tarehe 2 – 5 Desemba, 2025. Kwa mwaka huu, programu ya uanagenzi imetimiza miaka mitano tangu kuanzishwa kwake, na imeendelea kuchangia kwa kiasi kikubwa katika kuwaandaa wanafunzi kupitia uzoefu wa moja kwa moja kazini, kuimarisha ujuzi wa kiutendaji, na kupanua mtandao wao wa kitaaluma kama sehemu ya maandalizi ya kuingia kwenye soko la ajira.

Mkuu wa Chuo Dkt. Joyce Nyoni amewakaribisha rasmi wanafunzi wapya wa Chuo Cha Ustawi Wa Jamii kuanza muhula mpya wa masomo mwaka 2025/2026. Akiongea na Wanafunzi hao wapya Novemba 21, 2025, Dkt. Joyce Nyoni amewasisitiza wanafunzi kuwa na maadili mema, kuwa na nidhamu wakati wote ndani na nje ya mazingira ya chuo na kuweka mkazo katika masomo ili kufikia malengo yaliyowaleta chuoni. Pia ametoa wito kwa wanafunzi kutumia kwa namna endelevu fursa mbalimbali zinazopatikana chuoni, ikiwemo kushiriki kikamilifu katika shughuli za kijamii, kitaaluma na zinazochochea ukuaji wao binafsi. "Hamkuja tu hapa kusoma na kupata cheti cha Degree au Cheti cha Msingi au Diploma, bali kuhakikisha mnatoka hapa chuoni mkiwa na maarifa" alisema Dkt. Joyce. Katika mkutano huu na wanafunzi wapya, Mkuu wa Chuo aliambatana na Naibu Mkuu wa Chuo Taaluma, Naibu Kaimu Mkuu wa Chuo Utawala, Wakuu wa Idara za Taaluma, Mkurugenzi wa Huduma Saidizi za Kitaaluma, Mshauri wa Wanafunzi pamoja na Wakuu wa Idara na Vitengo.

Waziri wa Maendeleo ya Jamii, Jinsia, Wanawake na Makundi Maalum, Dkt. Dorothy Gwajima, ameagiza Menejimenti ya Wizara hiyo kuhakikisha kuwa huduma zote zinazotolewa kwa wananchi zinatolewa kwa ukaribu, kwa upendo na kwa kasi zaidi. Maagizo hayo yametolewa katika kikao kifupi cha Menejimenti kilichofanyika kabla ya kikao na watumishi wote wa wizara hiyo, Novemba 25, 2025, katika ofisi za Wizara zilizopo Mji wa Serikali jijini Dodoma Dkt. Gwajima amesisitiza kuwa kila kiongozi ana wajibu wa kuhakikisha watumishi walio chini ya uongozi wake wanatekeleza majukumu yao kwa kuzingatia misingi ya utu, huruma, ukaribu na uwajibikaji kwa wananchi. "Nahitaji watu wanaoweza kusongesha kaulimbiu ya llani yetu ya 'Kazi na Utu, Tunasonga Mbele' na kusonga mbele iwe kwa Kasi Zaidi Karibu Zaidi na Wananchi (KAZAKAZAWA)." amesema Dkt Gwajima. Katika Kikao Hicho Mkuu wa Chuo cha Ustawi wa Jamii, Dkt Joyce Nyoni alikuwa miongoni mwa viongozi wa Taasisi chini ya Wizara ya Maendeleo ya Jamii waliohudhuria.

Chuo cha Ustawi wa Jamii (ISW) kimeingia makubaliano na One Tanzanite Football Academy ya kuboresha Viwanja vya michezo #ISW Makubaliano hayo yameingiwa leo tarehe 11 Novemba, 2025 kati ya Dkt. Joyce Nyoni, Mkuu wa Chuo cha Ustawi wa Jamii pamoja na Bw. Agapiti Emmanuel, Mkurugenzi Mtendaji wa One Tanzanite Football Academy. Makubaliano hayo yameshuhudiwa na Timu ya Menejimenti ya #chuochaustawiwajamii na Baadhi ya maafisa kutoka One Tanzanite Football Academy.

Jaji Mfawidhi wa Mahakama Kuu – Divisheni ya Kazi, Dkt. Y. J. Mlyambina, tarehe 10 Oktoba 2025, amekabidhi Juzuu za Maamuzi ya Migogoro ya Kazi kwa Chuo cha Ustawi wa Jamii. Dkt. Mlyambina alikabidhi nakala mbili (2) za Juzuu za Maamuzi ya Migogoro ya Kazi Mahakama Kuu ya Tanzania pamoja na nakala sabini (70) za Labour Court Case Digest, akiwa ameambatana na mahakimu wa Mahakama Kuu. Juzuu hizo zimepokelewa na Naibu Mkuu wa Chuo – Fedha na Utawala, Dkt. Eventus Mugyabuso, kwa niaba ya Mkuu wa Chuo. Juzuu za Maamuzi ya Migogoro ya Kazi zinahusu kesi zilizotolewa maamuzi kuanzia mwaka 2010 hadi 2024, na zinatarajiwa kusaidia wanafunzi, wanazuoni wa sheria na watafiti kupata rejea sahihi na kuelewa mwenendo wa tafsiri za kisheria katika migogoro ya ajira nchini. Akizungumza katika makabidhiano hayo, Jaji Mlyambina amesema kuwa kuleta Juzuu hizo Chuo cha Ustawi wa Jamii ni heshima ya Kutambua mchango na kazi inayofanywa na chuo cha Ustawi wa Jamii, ambacho ni chuo pekee nchini kinachotoa taaluma za kazi na kuzalisha maafisa wanaokwenda kufanya kazi katika Mahakama za Kazi kama wasuluhishi na watatuzi wa migogoro ya ajira. Kwa Upande wake Naibu Mkuu wa Chuo #ISW Dkt. Eventus Mugyabuso amemshukuru sana Jaji Mlyambina kwa Kuona umuhimu wa kuleta Juzuu hizo #ISW ambazo zitaongeza ujuzi kwa wanafunzi wa Taaluma za kazi na wanazuoni kwa ujumla.

Watumishi wa Chuo cha Ustawi wa Jamii washiriki Kilele cha Maadhimisho ya Wiki ya Ustawi wa Jamii yaliyofanyika katika viwanja vya Chuo cha Ustawi wa jamii, Kijitonyama, Dar es Salaam Agosti 30, 2025. Mgeni Rasmi alikuwa Makamu wa Rais wa Jamhuri ya Muungano wa Tanzania - Dkt. Philip Isdor Mpango akiwakilishwa na Katibu Mkuu wa Wizara ya Maendeleo ya Jamii, Jinsia, Wanawake na Makundi Maalum - Dkt. John Jingu. Aidha Mgeni rasmi alizindua Kampeni ya "PATA MSAADA WA KISAIKOLOJIA; IMARISHA AFYA YA AKILI" , Sera ya Taifa ya Wazee 2003 (Toleo la Mwaka 2024), Kitini cha Wawezeshaji wa Mafunzo ya Malezi, Makuzi na Maendeleo ya Awali ya Mtoto na Kitini cha Ufundishaji wa Watoa Huduma za Afya ya Akili, Msaada wa Kisaikolojia na Kijamii kwa Vijana Balehe.

Mratibu wa kituo cha Elimu, Ushauri na Msaada wa Kisaikolojia, Rufina Khumbe akitoa maelezo kwa Waziri wa Maendeleo ya Jamii, Jinsia, Wanawake na Makundi Maalum, Mhe. Dkt. Dorothy Gwajima alipotembelea banda la ISW katika Maonesho ya Wiki ya Ustawi wa Jamii 2025 yanayofanyika katika viwanja vya Chuo cha Ustawi wa Jamii.

Kuelekea Wiki ya Ustawi wa Jamii, Kituo cha Elimu, Ushauri na Msaada wa Kisaikolojia kilitembelea Shule ya Sekondari Kiluvya tarehe 9 Agosti 2025 na kuzungumza na wanafunzi wa Kidato cha Tano kuhusu mada za ukatili wa kijinsia, mahusiano na mawasiliano, pamoja na Career Guidance. Mada hizi ziliwasilishwa kwa mbinu shirikishi na zenye kuhamasisha ushiriki wa wanafunzi.

Mkuu wa Chuo cha Ustawi wa Jamii, Dkt. Joyce Nyoni, ametembelea banda la #ChuoChaUstawiWaJamii katika Maonesho ya Nanenane yanayofanyika katika Viwanja vya Nzuguni, Dodoma, tarehe 8 Agosti 2025. Dkt. Nyoni alipokea maelezo kutoka kwa Mhadhiri Msaidizi Abubakar Fadhili na Mhadhiri Msaidizi Salama Limei kuhusu kozi ya Malezi, Makuzi na Maendeleo ya Awali ya Mtoto, pamoja na huduma za elimu na msaada wa kisaikolojia zinazotolewa kwa wananchi wanaotembelea banda hilo.

Kwa mwaka huu wa masomo 25/26 Chuo cha Ustawi wa Jamii kinadahili kozi muhimu na yenye fursa nyingi za Kujiajiri na kuajiriwa ya Malezi, Makuzi na Maendeleo ya Awali ya Mtoto kwa ngazi ya Certificate na Diploma ambayo inatolewa katika kampasi ya Kisangara, Mwanga pekee. Kozi hii itaandaa wataalam ambao watahakikisha mtoto anakuwa katika utimilifu wake; kiakili, kimwili, kijamii, kihisia, lugha, kiimani na kimaadili. Ili mtoto aweze kufikia utimilifu wake ni lazima apate afua mbalimbali ikiwa ni pamoja na afya, lishe bora, malezi yenye mwitikio, afua za ufunzaji wa awali, ulinzi na usalama, na uchangamshi wa awali. Wahitimu wa Kozi hii wanaweza kujiajiri lakini pia kuajiriwa katika maeneo mbalimbali, ikiwa ni pamoja na kwenye vituo vya kulelea watoto mchana, vituo vya afya, katika dawati la mama na mtoto, makao ya watoto, kwenye madawati ya watoto, mashuleni, na kwenye mashirika yasio ya kiserikali ya kitaifa na kimataifa. Tunawakaribisha sana Wahitimu wa kidato cha nne na sita na wote ambao wangependa Kupata ujuzi adhimu wa kozi hii kufanya maombi ya Kozi hii pindi dirisha la awamu ya pili ya Udahili wa Certificate na Diploma utakapo funguliwa.

Wanafunzi wa Chuo cha Ustawi wa Jamii watembelea kiwanda cha Kiboko Continuous Galvanizing Line kilichopo Mikocheni, Dar es Salaam. Lengo la ziara hii lilikuwa kuwawezesha wanafunzi kujifunza kwa vitendo kuhusu afya na usalama mahala pa kazi na kuona kwa karibu uhalisia wa yale wanayojifunza darasani.

Chuo cha Ustawi wa Jamii kilishiriki Maonesho ya Sita ya Elimu ya Juu Zanzibar, 14 Julai - 20 Julai 2025. Ilikuwa ni wakati mzuri wa Chuo kukutana na wanafunzi wa kidato cha sita wenye ndoto kubwa ya kujiendeleza kitaaluma.

Wahadhiri na wanafunzi kutoka Chuo Kikuu cha Texas, Marekani watembelea Chuo cha Ustawi wa Jamii kwa lengo la kuimarisha mahusiano ya kitaaluma na kutambua fursa za ushirikiano katika nyanja za utafiti, ubadilishanaji wa maarifa na maendeleo ya kitaaluma. Ziara hii ni hatua muhimu kuelekea kujenga ushirikiano wa kimataifa unaolenga kuinua ubora wa elimu inayotolewa taasisi.

Mkuu wa Chuo cha Ustawi wa Jamii, Dkt. Joyce Nyoni, amefanya ziara ya ukaguzi wa ujenzi wa madarasa mapya unaoendelea katika Kampasi ya Dar es Salaam, ambapo hadi sasa ujenzi huo umekamilika kwa asilimia 16 na unatarajiwa kukamilika rasmi ifikapo Mwanzoni mwa Mwaka 2025. Mradi huu unalenga kuboresha miundombinu ya kujifunzia katika kampasi ya Dar es Salaam.