Tunawakaribisha Wanadodoma hasa wanafunzi wa shule za sekondari na wahitimu wa kidato cha sita kufika na kupata huduma katika Banda la Chuo cha Ustawi wa Jamii katika Maonesho ya Nanenane yanayofanyika viwanja vya Nzuguni, Dodoma.

Kwa mwaka huu wa masomo 25/26 Chuo cha Ustawi wa Jamii kinadahili kozi muhimu na yenye fursa nyingi za Kujiajiri na kuajiriwa ya Malezi, Makuzi na Maendeleo ya Awali ya Mtoto kwa ngazi ya Certificate na Diploma ambayo inatolewa katika kampasi ya Kisangara, Mwanga pekee. Kozi hii itaandaa wataalam ambao watahakikisha mtoto anakuwa katika utimilifu wake; kiakili, kimwili, kijamii, kihisia, lugha, kiimani na kimaadili. Ili mtoto aweze kufikia utimilifu wake ni lazima apate afua mbalimbali ikiwa ni pamoja na afya, lishe bora, malezi yenye mwitikio, afua za ufunzaji wa awali, ulinzi na usalama, na uchangamshi wa awali. Wahitimu wa Kozi hii wanaweza kujiajiri lakini pia kuajiriwa katika maeneo mbalimbali, ikiwa ni pamoja na kwenye vituo vya kulelea watoto mchana, vituo vya afya, katika dawati la mama na mtoto, makao ya watoto, kwenye madawati ya watoto, mashuleni, na kwenye mashirika yasio ya kiserikali ya kitaifa na kimataifa. Tunawakaribisha sana Wahitimu wa kidato cha nne na sita na wote ambao wangependa Kupata ujuzi adhimu wa kozi hii kufanya maombi ya Kozi hii pindi dirisha la awamu ya pili ya Udahili wa Certificate na Diploma utakapo funguliwa.

Wanafunzi wa Chuo cha Ustawi wa Jamii watembelea kiwanda cha Kiboko Continuous Galvanizing Line kilichopo Mikocheni, Dar es Salaam. Lengo la ziara hii lilikuwa kuwawezesha wanafunzi kujifunza kwa vitendo kuhusu afya na usalama mahala pa kazi na kuona kwa karibu uhalisia wa yale wanayojifunza darasani.

Chuo cha Ustawi wa Jamii kilishiriki Maonesho ya Sita ya Elimu ya Juu Zanzibar, 14 Julai - 20 Julai 2025. Ilikuwa ni wakati mzuri wa Chuo kukutana na wanafunzi wa kidato cha sita wenye ndoto kubwa ya kujiendeleza kitaaluma.

Wataalam wa Ustawi wa jamii kutoka Chuo cha Ustawi wa Jamii,Serikali ya Kata Ubungo, Wadau na Wazazi wakutana kujadili afua za watoto wanaoishi na kufanya kazi mtaani. Lengo la kikao hiki ni kuishirikisha jamii kuhusu kutatua matatizo yanayowakabili watoto hao na kuondokana na tatizo la watoto wanaoishi na kufanya kazi mitaani kupata ushirikiano wao, na kusikiliza maoni na mapendekezo kutoka kwao kuhusu namna bora ya kuwasaidia watoto wa mitaani kwa njia ya malezi, elimu, na msaada wa kijamii.

Wahadhiri na wanafunzi kutoka Chuo Kikuu cha Texas, Marekani watembelea Chuo cha Ustawi wa Jamii kwa lengo la kuimarisha mahusiano ya kitaaluma na kutambua fursa za ushirikiano katika nyanja za utafiti, ubadilishanaji wa maarifa na maendeleo ya kitaaluma. Ziara hii ni hatua muhimu kuelekea kujenga ushirikiano wa kimataifa unaolenga kuinua ubora wa elimu inayotolewa taasisi.

Naibu Mkuu wa Chuo cha Ustawi wa Jamii taaluma, Prof. Sotco Komba, amewatunuku vyeti wahitimu wa programu ya uanagenzi wanafunzi waliokamilisha mafunzo kwa vitendo katika taasisi mbalimbali. Prof. Komba amehimiza vijana kutumia fursa zilizopo chuoni na kutoa wito kwa taasisi mbalimbali kuendelea kutoa nafasi za mafunzo kwa vitendo ili kuwajengea uwezo wa kujiajiri. Nao Wamiliki wa taasisi wamekipongeza Chuo kwa kuanzisha programu yenye mchango mkubwa kwa maendeleo ya vijana, wakisisitiza umuhimu wa kuendelezwa. Aidha Wahitimu walitoa ushuhuda wa namna mafunzo hayo yalivyowawezesha kiujuzi na kitaaluma.

Chuo cha Ustawi wa Jamii, kupitia Dawati la Kijinsia, kimeendesha mafunzo maalum kwa wajumbe wa kamati ya Dawati la Kijinsia ili kujenga uelewa kuhusu Ukatili wa Kijinsia (GBV) na huduma ya ushauri nasihi kwa manusura. Mafunzo hayo yalihusu: Aina na dalili za ukatili wa kijinsia, Sababu zinazoendeleza ukatili wa kijinsia, Jinsi ya kutoa msaada wa kisaikolojia kwa waathirika na Ujuzi wa msingi kwa washauri nasaha

Chuo cha Ustawi wa Jamii (ISW) tarehe 10 Juni, 2025 kimeandaa Mafunzo ya Uandishi wa Kitaaluma (Capacity Building on Academic Writing) kwa wakufunzi wake. Mafunzo hayo yamejikita katika mbinu za kufanya utafiti, kuandika utangulizi wa tafiti, na kufanya mapitio ya maandiko. Mafunzo haya yatafanyika kwa siku mbili, tarehe 10 na 11 Juni 2025, kwa lengo la kuwajengea uwezo washiriki kuwa watafiti wenye ufanisi na kuandaa tafiti za kitaaluma kwa viwango bora.

Katibu Mkuu Wizara ya Maendeleo ya Jamii, Jinsia, Wanawake na Makundi Maalum Dkt. John Jingu amesema Programu za Ubunifu, Uanagenzi na Ushauri Nasihi ni fursa ya ajira kwa vijana nchini huku akiwahimiza vijana kutumia fursa hiyo ili wanapomaliza Chuo waweze kujiajiri na kuajiri wengine. Dkt. Jingu ameyasema hayo wakati wa ziara yake katika Chuo cha Ustawi wa Jamii Aprili 17, 2025 kukagua maendeleo ya mradi wa jenzi wa jengo la mihadhara na utoaji huduma Chuoni hapo. Katika ziara hii Dkt. Jingu amewasihi wanafunzi wa Chuo cha Ustawi wa Jamii kushiriki katika programu zinazotatua changamoto mbalimbali katika jamii ili elimu waliyoipata iweze kutoa matokeo chanya katika jamii. "Ninyi ni mainjinia wa kuleta mabadiliko katika jamii nimevutiwa sana na programu mnazoshiriki na kufanya hapa chuoni na kusema kweli ni nzuri sana" Ubunifu, Uanagenzi, Utoaji wa ushauri nasihi zote hizi ni fursa za ajira kwenu msizichukulie kimzaha" amesisitiza Dkt. Jingu. Aidha amewaasa wanafunzi kuongeza juhudi ya kusoma zaidi ya darasani ila pia kuendana na kasi ya utumiaji teknolojia kama vile akili bandia kutoa huduma na kuwa na mahusiano mazuri na wadau wa sekta washirika ambao ni muhimu kwao. Dkt. Jingu ameipongeza Menejimenti ya Chuo hicho kwa ubunifu katika kutoa elimu na Huduma za Kitaaluma hivyo kuendelea kwa Chuo kuonekana umuhimu wake kwa jamii na kuendelea kuwa kitovu cha ubora wa elimu na ujuzi unaoenda kutatua changamoto katika jamii na kuboresha maisha ya watanzania ambalo ndio lengo la Serikali ya Rais Mhe. Dkt. Samia Suluhu Hassan. Pia Dkt. Jingu ametembelea mradi wa ujenzi wa ukumbi wa mihadhara na hatua za utekelezaji huku akisisitiza ubora na ukamilishwaji wa mradi kwa wakati. Kwa upande wake Mkuu wa Chuo cha Ustawi wa Jamii Dkt. Joyce Nyoni amesema Chuo kimeandaa mitaala mipya minne (4), itakayoongeza programu 15 za mafunzo katika fani mbalimbali ambapo Mitaala hiyo imepata ithibati na itaanza kutumika katika mwaka wa masomo 2025/2026.

Kamati ya Kudumu ya Bunge ya Ustawi na Maendeleo ya Jamii ikiongozwa na Mwenyekiti wake Mhe. Fatma Toufiq, imetembelea mradi wa ujenzi wa ukumbi wa mihadhara #chuochaustawiwajamii kampasi ya Dar es Salaam tarehe 17 Machi, 2025. Baada ya ukaguzi kamati imeridhishwa na ubora wa mradi huo, muda na gharama iliyotumika ambapo ujenzi huo umefikia asilimia 38 ukijengwa kwa fedha za mapato ya ndani. "Mradi huu unatarajiwa kukamilika mwezi juni 2025, ambapo ukumbi huo utaweza kuhudumia wanafunzi 419 kwa wakati mmoja" alisema Dkt Joyce Nyoni - Mkuu wa Chuo ISW. Nimeridhishwa na maendeleo ya mradi huu na niwapongeze Mkuu wa Chuo Dkt Joyce Nyoni na menejimenti ya Chuo cha Ustawi wa Jamii kwa kazi nzuri ya Kusimamia mradi huo kwa Fedha za ndani alisema Mhe Fatma Toufiq - Mwenyekiti wa Kamati. Kamati imeahidi kuwasilisha bungeni pendekezo kwa serikali kuongezea fedha katika mradi huo ili fedha hizo zikasaidie katika ukamilishaji wa Ujenzi kwa haraka na katika ubora.

Bodi ya Magavana ya Chuo cha Ustawi wa Jamii Chini ya Uenyekiti wa Bi. Sofia Simba Leo tarehe 25 Februari, 2025 imetembelea na Kukagua Miradi ya maendeleo na Miundombinu ya Chuo cha Ustawi wa Jamii, Kampasi ya Kisangara, Mwanga, mkoani Kilimanjaro.Mwenyekiti wa bodi Bi. Sofia Simba pamoja na Wajumbe wa Bodi hiyo wameipongeza Menejimenti ya Chuo cha Ustawi wa Jamii kwa kazi kubwa iliyofanyika ya kukamilisha ujenzi wa Mabweni ya wanafunzi, bwalo la kulia chakula, kuongeza ofisi za watumishi na Kuongeza Wahadhiri pamoja na Watumishi waendeshaji katika kampasi ya Kisangara kama ilivyowasilishwa katika ripoti ya Meneja wa kampasi. Bodi ya Magavana imevutiwa zaidi na kukamilika kwa darasa mfano la kujifunzia la Kozi ya Malezi, Makuzi na maendeleo ya awali ya mtoto inayotolewa katika kampasi ya Kisangara ambacho ni Kituo cha Umahiri wa Kozi hii. "Darasa mfano hili ni dogo kwa Ukubwa wa programu yetu na mahitaji ya ndani ya chuo pamoja na Kufundishia walezi na walimu wa shule za kulelea watoto zinazozunguka wilaya ya mwanga na Mkoa wa Kilimanjaro" alisema Dkt. Adolf Rutayuga Mjumbe wa Bodi ya Magavana. Mwisho Bodi imeshauri Menejimenti ya Chuo kuongeza Upandaji miti ili kuboresha mandhari na Mazingira ya Kampasi hiyo.

NACTVET watembelea Chuo cha Ustawi wa Jamii, Kampasi ya Dar es Salaam tarehe 19 Februari 2025 na kufanya tathmini na ukaguzi wa miundombinu ya chuo. Zoezi hili limefanyika ikiwa ni maandalizi ya NACTVET kutoa idhibati ya kuanzishwa kwa programu mpya za masomo katika Chuo cha Ustawi wa Jamii

Chuo cha Ustawi wa Jamii kimefanya kikao cha 19 cha Baraza la Wafanyakazi chini ya uenyekiti wa Mkuu wa Chuo, Dkt. Joyce Nyoni, 05 Februari, 2025 katika kampasi ya Dar es Salaam Kikao hiki kimewakutanisha wafanyakazi wa chuo pamoja na wawakilishi wa vyama vya wafanyakazi kwa ajili ya kujadili masuala muhimu ya maendeleo ya taasisi na ustawi wa wafanyakazi. Miongoni mwa ajenda zilizojadiliwa ni tathmini ya utekelezaji wa mipango na miradi 2024/2025 Washiriki wa kikao wamejadili kwa kina masuala haya kwa lengo la kuboresha mazingira ya kazi na kuhakikisha taasisi inaendelea kutekeleza majukumu yake kwa ufanisi.

Serikali, kupitia Wizara ya Fedha, imeitunuku Chuo cha Ustawi wa Jamii Cheti cha Shukrani kwa kutambua mchango unaotolewa na chuo katika kutoa huduma kwa Jamii. Huduma hizo ni ushauri nasihi pindi maafa mbalimbali yanapotokea nchini, ushauri kwa vijana na familia na kuchangia katika kuimarisha huduma za ustawi wa jamii kwa wananchi wa makundi yote, hasa wenye uhitaji zaidi.

Mkuu wa chuo Dkt. Joyce Nyoni amewatunuku vyeti Waelimisha rika "peer educators" ambao ni wanafunzi wa Chuo cha Ustawi wa Jamii walikuwa sehemu ya kupata mafunzo hayo yaliyoandaliwa na Unesco Tanzania kwa Kushirikiana na Chuo cha Ustawi wa Jamii chini ya mradi wa O3 Plus. Hafla hiyo ya kuhitimisha Mafunzo ya Waelimisha rika katika masuala ya Jinsia, Kuzuia ukatili wa kijinsia na UKIMWI, imefanyika tarehe 04 Februari, 2025 katika kampasi ya Dar es Salaam ambapo wahitimu 20 wamefuzu mafunzo hayo. Kabla ya kutunuku vyeti Dkt. Joyce amewapongeza wanafunzi hao kwa kutenga muda wao kujifunza masuala ya Kuzuia Ukatili wa kijinsia na UKIMWI pia amewasisitiza wahitimu hao wakawasaidie wanafunzi wenzao hususan wanafunzi wa ngazi ya Cheti kuelimishwa juu ya masuala ya Kuzuia Ukatili wa Kijinsia na UKIMWI. Aidha kwa upande wake Mratibu wa Mradi wa 03 Plus kwa Dar es Salaam, Bi Numbilya Kiseko amewasisitiza wahitimu hao wakawe madaraja na chachu ya kuwapa wanafunzi taarifa sahihi na kuwaelimisha wanafunzi wenzao juu ya masuala ya kuzuia ukatili wa kijinsia na UKIMWI. Mafunzo haya yamewajengea uwezo na kuwapa maarifa wahitimu ambao watakuwa mstari wa mbele katika kuwaelimisha wanafunzi juu ya masuala ya mahusiano, kuzuia ukatili ya Kijinsia na UKIMWI.

Chuo cha Ustawi wa Jamii chakutanisha wawakilishi wa mashirika ya kitaifa na kimataifa, pamoja na wahadhiri na wanafunzi wa Chuo cha Ustawi Wa Jamii tarehe 24, Januari 2025 Katika kampasi ya Dar es Salaam kujadili mapitio ya mitaala. Akizungumza katika mkutano huo Naibu Mkuu wa Chuo Taaluma, Utafiti na Ushauri Prof. Sotco Komba amesisitiza umuhimu wa ushirikiano kati ya taasisi za elimu na wadau wa maendeleo ya jamii ili kuhakikisha mitaala hiyo inakidhi mahitaji ya sasa ya kijamii na soko la ajira. Miongoni mwa masuala muhimu yaliyojadiliwa katika mkutano huo ni pamoja na uboreshaji wa mitaala ili iendane na mabadiliko ya kijamii na teknolojia, kuimarisha mafunzo kwa vitendo kwa kushirikiana na mashirika mbalimbali, na kukuza matumizi ya teknolojia ya kisasa katika ufundishaji na kufanya tafiti..

Chuo cha Ustawi wa Jamii chashiriki Tamasha la kimataifa la Maendeleo ya Filamu na Sanaa lililofanyika katika viwanja vya Posta, Kijitonyama Dar es Salaam kuanzia tarehe 11 Desemba na kumalizika tarehe 15 Desemba . Aidha wanafunzi wa chuo ustawi wa jamii walipata nafasi ya kushiriki katika mdahalo kuhusu Jinsia na Sanaa, mdahalo ambao uliitwa "Binti Longa Gender" na Kubadilishana mawazo na wasanii na wawezeshaji katika mdahalo huo.

Mkuu wa Chuo cha Ustawi wa Jamii, Dkt. Joyce Nyoni, amefanya ziara ya ukaguzi wa ujenzi wa madarasa mapya unaoendelea katika Kampasi ya Dar es Salaam, ambapo hadi sasa ujenzi huo umekamilika kwa asilimia 16 na unatarajiwa kukamilika rasmi ifikapo Mwanzoni mwa Mwaka 2025. Mradi huu unalenga kuboresha miundombinu ya kujifunzia katika kampasi ya Dar es Salaam.